എന്തൊക്കെ കാര്യങ്ങള്‍ ചെയ്യാന്‍ പാടില്ല എന്ന് തന്നെ പഠിപ്പിച്ചല്‍ പ്രധാനമന്ത്രി നരേന്ദ്രമോദിയാണെന്ന് രാഹുല്‍ ഗാന്ധി. മൂന്ന് സംസ്ഥാനങ്ങളില്‍ കോണ്‍ഗ്രസ് നടത്തിയ മുന്നേറ്റത്തിന് ശേഷം മോദിയെ നിശിതമായി വിമര്‍ശിച്ചാണ് രാഹുല്‍ ഗാന്ധി രംഗത്തെത്തിയത്. ചെയ്യാന്‍ പാടില്ലാത്ത കാര്യങ്ങള്‍ ഏതൊക്കെയെന്ന് തന്നെ പഠിപ്പിച്ച ഗുരു മോദിയാണെന്ന് പറയുമ്പോള്‍ അത് ബിജെപി നേതൃത്വത്തിന് നേരെയുള്ള കടുത്ത പരിഹാസം കൂടിയാണ്.
പ്രധാനമന്ത്രി ഇപ്പോള്‍ തളര്‍ന്നിരിക്കുകയാണെന്നും പ്രതിപക്ഷത്തിന്റെ സമ്മര്‍ദ്ദത്തോട് പ്രതികരിക്കാന്‍ അദ്ദേഹത്തിന് കഴിയുന്നില്ലെന്നും രാഹുല്‍ ഗാന്ധി ആഞ്ഞടിച്ചു. നല്‍കിയ വാഗ്ദാനങ്ങള്‍ ഒന്നും പാലിക്കാന്‍ മോദിക്കു കഴിയില്ലെന്ന് ജനങ്ങള്‍ക്കു ബോധ്യപ്പെട്ടു. അഴിമതി പോലെയുള്ള വിഷയങ്ങള്‍ ഉയര്‍ത്തി അധികാരത്തിലെത്തിയ മോദി തന്നെ ഇപ്പോള്‍ അഴിമതിയില്‍ പങ്കാളിയാണെന്നാണ് ജനങ്ങള്‍ കരുതുന്നത്. ഈ തിരഞ്ഞെടുപ്പ് പരാജയം അതിന്റെ തെളിവാണ് - രാഹുല്‍ ആരോപിച്ചു.
വലിയ അവസരം ലഭിച്ചിട്ടും രാജ്യത്തിന്റെ ഹൃദയമിടിപ്പിന് ചെവി കൊടുക്കാതെ ധാര്‍ഷ്ട്യത്തോടെ പ്രവര്‍ത്തിക്കുന്ന പ്രധാനമന്ത്രിയെയാണ് രാജ്യം കണ്ടതെന്നും രാഹുല്‍ ഗാന്ധി ആരോപിച്ചു.
