ചിന്തയെ തോല്‍പ്പിക്കാന്‍ ഒരു ചന്തുവിനും ആകില്ല മക്കളേ...
എത്ര ട്രോളിയിട്ടും കാര്യമില്ല മക്കളേ...ചിന്തയെ തോല്‍പ്പിക്കാനാവില്ല !
ജിമിക്കി കമ്മല്‍ എന്ന സൂപ്പര്‍ ഹിറ്റ് പാട്ടിനെ നിരൂപണം ചെയ്ത് സോഷ്യല്‍ മീഡിയയിലെ ട്രോളുകള്‍ ഏറ്റുവാങ്ങിയ യുവ രാഷ്ട്രീയ നേതാവാണ് ചിന്ത ജെറോം. ട്രോളന്മാരുടെ ഇഷ്ട കഥാപാത്രമായി മാറിയ ചിന്ത കഴിഞ്ഞ ദിവസം വീണ്ടും എത്തിയിരുന്നു. ഇന്ത്യ-ന്യൂസിലാന്‍ഡ് ട്വന്റി20 മത്സരത്തില്‍ വ്യത്യസ്തമായ പോസ്റ്ററുമായെത്തിയാണ് ചിന്ത ജെറോം ഏവരെയും ഞെട്ടിച്ചത്.
ലോകം മുഴുവന്‍ ഉറ്റുനോക്കിയ കാര്യവട്ടം സ്‌റ്റേഡിയത്തിലെ ഗ്യാലറിയില്‍ കേരള മുഖ്യമന്ത്രി പിണറായി വിജയന്റെ ചിത്രവുമായാണ് ചിന്ത കളി കാണാനെത്തിയത്. ഇന്ത്യ-ന്യൂസിലാന്‍ഡ് ട്വന്റി20 പരമ്പരയിലെ അവസാന മത്സരമാണ് കഴിഞ്ഞദിവസം കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ നടന്നത്.
മഴ കളിമുടക്കുമെന്ന് കരുതിയിരുന്നെങ്കിലും ഓവറുകള്‍ വെട്ടിച്ചുരുക്കി അവസാനനിമിഷം മത്സരം ആരംഭിച്ചു. മത്സരത്തില്‍ ന്യൂസിലാന്‍ഡിനെ പരാജയപ്പെടുത്തി ഇന്ത്യ പരമ്പര സ്വന്തമാക്കുകയും ചെയ്തു. മിക്കവരും പ്രിയപ്പെട്ട ക്രിക്കറ്റ് താരങ്ങളുടെ പ്ലക്കാര്‍ഡുമായെത്തിയപ്പോള്‍ കേരള മുഖ്യമന്ത്രി പിണറായി വിജയന്റെ ചിത്രവുമായെത്തിയാണ് ചിന്ത ശ്രദ്ധ പിടിച്ചുപറ്റിയത്.
ലോകം മുഴുവന്‍ ശ്രദ്ധിക്കുന്ന ക്രിക്കറ്റ് മത്സരത്തിനിടയില്‍ കേരള രാഷ്ട്രീയത്തെ ഉയര്‍ത്തിക്കാണിച്ചതിന് ചിന്തയെ അനുകൂലിച്ച് നിരവധിപേരാണ് ഫേസ്ബുക്കില്‍ കമന്റ് ചെയ്തിരിക്കുന്നത്. അതേസമയം, ചിന്തയുടെ പ്ലക്കാര്‍ഡിനെ വിമര്‍ശിക്കാനും ചിലരുണ്ടായിരുന്നു. ക്രിക്കറ്റിനെ രാഷ്ട്രീയമായി കൂട്ടിക്കലര്‍ത്തുന്നതിനോട് എതിര്‍പ്പെന്നാണ് പ്രതികൂലിക്കുന്നവരുടെ നിലപാട്. ഫേസ്ബുക്കില്‍ പങ്കുവെച്ച ചിത്രങ്ങള്‍ക്ക് താഴെ ജിമിക്കി കമ്മല്‍ ട്രോളുകളെ ഓര്‍മ്മിപ്പിച്ചും ഒട്ടേറേപേര്‍ കമന്റ് ചെയ്തു.
