രജനികാന്തിന്‍റെ അണ്ടര്‍വേള്‍ഡ് ത്രില്ലര്‍ ‘കാലാ’ ജൂണ്‍ ഏഴിന് റിലീസ് ചെയ്യും. ചിത്രത്തിന്‍റെ തമിഴ്, തെലുങ്ക്, ഹിന്ദി പതിപ്പുകള്‍ ഒരേ ദിവസം റിലീസ് ചെയ്യുമെന്നാണ് അറിയിച്ചിട്ടുള്ളത്. ചിത്രം ഏപ്രില്‍ 27ന് റിലീസ് ചെയ്യാനാണ് ആദ്യം തീരുമാനിച്ചിരുന്നത്. എന്നാല്‍ ഇടയ്ക്ക് വന്ന സിനിമാ സമരം മൂലം ഡേറ്റ് വൈകുകയായിരുന്നു.
മൂന്ന് ഭാഷയിലുള്ള പതിപ്പുകളും ഒരുമിച്ച് റിലീസ് ചെയ്യാനുള്ള നിര്‍മ്മാതാവ് ധനുഷിന്‍റെ തീരുമാനം കാലായ്ക്ക് വലിയ മാസ് ഓപ്പണിംഗിന് അവസരമായി. കബാലിക്ക് ശെഷം പാ രഞ്ജിത് സംവിധാനം ചെയ്യുന്ന ‘കാലാ’യും ഒരു അധോലോകനായകന്‍റെ കഥയാണ് പറയുന്നത്.
തിരുനെല്‍‌വേലിയില്‍ നിന്ന് മുംബൈയിലെ ധാരാവിയിലെത്തുകയും അവിടെ സ്വന്തമായി അധോലോകം പടുത്തുയര്‍ത്തുകയും ചെയ്ത കാലാ ആയി രജനി എത്തുന്നു. നാനാ പടേക്കര്‍ ആണ് പ്രധാന വില്ലന്‍ കഥാപാത്രത്തെ അവതരിപ്പിക്കുന്നത്.
ഹ്യുമ ഖുറേഷി നായികയാകുന്ന സിനിമയില്‍ സമ്പത്ത്, സുകന്യ, സമുദ്രക്കനി തുടങ്ങിയവരും പ്രധാന വേഷങ്ങളിലുണ്ട്. സന്തോഷ് നാരായണനാണ് സംഗീതം.
