ഓഗസ്റ്റ് സിനിമാസിന്‍റെ ബാനറില്‍ പൃഥ്വിരാജ് നായകനാകുന്ന ‘അയ്യപ്പന്‍’ അഞ്ച് ഭാഷകളില്‍ റിലീസ് ചെയ്യും. നിര്‍മ്മാതാവ് ഷാജി നടേശന്‍ അറിയിച്ചതാണ് ഇക്കാര്യം.
ശങ്കര്‍ രാമകൃഷ്ണന്‍ സംവിധാനം ചെയ്യുന്ന ചിത്രം 50 കോടിയോളം മുതല്‍മുടക്കിലാണ് ഒരുങ്ങുന്നത്. അയ്യപ്പന്‍ എന്ന രാജകുമാരന്‍റെ, യോദ്ധാവിന്‍റെ, വിപ്ലവകാരിയുടെ ജീവിതമാണ് ഈ സിനിമ പറയുന്നത്.
മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളില്‍ അയ്യപ്പന്‍ പുറത്തിറങ്ങും. ഒരു ഇംഗ്ഗ്ലീഷ് പതിപ്പും ആലോചനയിലുണ്ട്. അതേസമയം, മലയാളത്തിന്‍റെ അഭിമാന നക്ഷത്രങ്ങളായ മമ്മൂട്ടിയോ മോഹന്‍ലാലോ ഈ സിനിമയുമായി സഹകരിക്കുമോ എന്ന ചോദ്യം ആരാധകര്‍ ഉയര്‍ത്തിയിട്ടുണ്ട്.
ഇരുവരില്‍ ആരെങ്കിലും ഒരാള്‍ ഈ സിനിമയില്‍ അഭിനയിച്ചേക്കാനുള്ള സാധ്യതയാണ് തേടുന്നത്. എന്നാല്‍ ഇപ്പോള്‍, അതേക്കുറിച്ചുള്ള വിശദാംശങ്ങള്‍ ലഭ്യമല്ല.
ഓഗസ്റ്റ് സിനിമാസുമായി വളരെ അടുപ്പം പുലര്‍ത്തുന്നയാളാണ് മമ്മൂട്ടി. പൃഥ്വിരാജുമായി മികച്ച സൌഹൃദം സൂക്ഷിക്കുന്നയാളാണ് മോഹന്‍ലാല്‍. അതുകൊണ്ടുതന്നെ മമ്മൂട്ടിയോ ലാലോ അല്ലെങ്കില്‍ രണ്ടുപേരും ഒരുമിച്ചോ അയ്യപ്പനില്‍ പ്രത്യക്ഷപ്പെടാനുള്ള സാധ്യത തള്ളിക്കളയാനാവില്ല.
2020 ജനുവരിയില്‍ ആണ് അയ്യപ്പന്‍ റിലീസ് ചെയ്യാന്‍ ഉദ്ദേശിക്കുന്നത്.
