മലയാള സിനിമാ ലോകം പ്രതീക്ഷയോടെ കാത്തിരിക്കുന്ന ചിത്രമാണ് ‘ലൂസിഫര്‍’. പൃഥ്വിരാജിന്റെ സംവിധാനത്തില്‍ ആരാധകരുടെ പ്രിയതാരം മോഹന്ലാല് നായകനാകുന്നു എന്നതാണ് സിനിമയുടെ പ്രധാന സവിശേഷത.
ലൂസിഫറിനെക്കുറിച്ചുള്ള ആദ്യ വിവരങ്ങള്‍ പുറത്തുവന്നപ്പോള്‍ മുതല്‍ ആരാധകര്‍ ത്രില്ലിലാണ്. ചിത്രവുമായി ബന്ധപ്പെട്ട ഓരോ റിപ്പോര്‍ട്ടുകള്‍ക്കും വന്‍ സ്വീകാര്യതയാണ് ലഭിക്കുന്നത്.
ചിത്രീകരണത്തിനിടെ മോഹന്‍‌ലാലില്‍ നിന്നുണ്ടായ ഒരു പ്രതികരണം കഴിഞ്ഞ ദിവസം പൃഥ്വിരാജ് പങ്കുവച്ചിരുന്നു. മോഹന്‍ലാലിന്റെ ഫേസ്ബുക്ക് ലൈവില്‍ ചെന്നൈയില്‍ നിന്ന് പങ്കെടുത്താണ് പൃഥ്വി ഇക്കാര്യം അറിയിച്ചത്. ഇതാണ് ആരാധകരുടെ ഇടയില്‍ വൈറലാകുന്നത്.
“സിനിമയുടെ ഫസ്റ്റ് ഡേ ഫസ്റ്റ് ഷോട്ടിന് ലാലേട്ടന്‍ ക്യാമറയ്ക്ക് മുന്നിലേക്ക് വന്നത് എനിക്കിപ്പോഴും ഓര്‍മ്മയുണ്ട്. സാര്‍, ഞാന്‍ എന്താണ് ചെയ്യേണ്ടത് എന്നായിരുന്നു അദ്ദേഹത്തിന്റെ ചോദ്യം. ഇതുകേട്ട് ഞാന്‍ അമ്പരന്നു. അടുത്തുനിന്ന മുരളി ഗോപിയുടെ ചെവിയില്‍ ഞാന്‍ ചോദിച്ചു, ലാലേട്ടന്‍ എന്നെ ടെസ്റ്റ് ചെയ്യുകയാണോ എന്ന്“ - പൃഥ്വിരാജിന്റെ ഈ വാക്കുകളാണ് ഇപ്പോള്‍ സമൂഹമാധ്യമങ്ങളില്‍ വൈറലായത്.
പൃഥ്വി സംവിധായകനായി അരങ്ങേറ്റം കുറിക്കുന്ന ചിത്രത്തില്‍ സ്റ്റീഫന്‍ നെടുമ്പള്ളി എന്ന രാഷ്ട്രീയ പ്രവര്‍ത്തകനായാണ് മോഹന്ലാല് എത്തുന്നത്. മുരളി ഗോപി തിരക്കഥയൊരുക്കുന്നത്. വന്‍ താരനിരയാണ് സിനിമയില്‍ അണിനിരക്കുന്നത്.
